ନିର୍ଭୟ’ର ୬ଷ୍ଠ ବାର୍ଷିକୋତ୍ସବ

ଭୁବନେଶ୍ୱର(କଳିଙ୍ଗ ରିପୋର୍ଟର): ଦୀର୍ଘ ୪୦ ବର୍ଷ ଧରି ସାମ୍ବାଦିକ ଦୁନିଆରେ ହେଉଥିବା ସମୁଦ୍ର ମନ୍ଥନର ଶ୍ରେଷ୍ଠ ଅମୃତ ଭାବେ ନିର୍ଭୟ ଆଗମନ ହୋଇଥିଲା । ନିର୍ଭିକ ଭାବରେ ନିର୍ଭୟ ଏତେ ସମୟ ଚାଲିଆସିବା ଏକ ବଡ଼ ଉପଲବ୍ଧି । ନିର୍ଭୟ ଭଳି ରାଜ୍ୟରେ ଥିବା କିଛି ସମ୍ବାଦପତ୍ର ଯୋଗୁଁ ବିକଳ୍ପ ବିଚାର ବାହାରି ପାରୁଛି । ସମସ୍ତେ ହଁରେ ହଁ ମିଳାଉନାହାନ୍ତି । ସ୍ଥାବକ ସାଜୁନାହାନ୍ତି ସେମାନେ । ତେଣୁ ଗଣତନ୍ତ୍ର ବିକାଶ ପାଇଁ ଏହି ବିକଳ୍ପ ବିଚାରର ବଡ଼ ଆବଶ୍ୟକତା ରହିଛି । ନିର୍ଭୟର ସମ୍ପାଦକ ପ୍ରତ୍ୟେକ ଦିନ ସଂଘର୍ଷ କରୁଛନ୍ତି । ସେ ଜଣେ ଜନ୍ମଜାତ କ୍ରାନ୍ତିକାରୀ ଲୋକ । ଠିକ ରହିବା ଏକ ତପସ୍ୟା । ନିଜେ ତାହା କରିବା ସହ ନିର୍ଭୟ ପରିବାର ଗଢ଼ି ସେମାନଙ୍କୁ ବି ଠିକ ରହିବା ଭିତରେ ରହି ଓଡ଼ିଶାରେ ଉଦାହରଣ ପ୍ରସ୍ତୁତ କରିଛନ୍ତି ବୋଲି‘ କେନ୍ଦ୍ର ପେଟ୍ରୋଲିୟମ, ପ୍ରାକୃତିକ ବାଷ୍ପ ତଥା ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ।
‘ନିର୍ଭୟ’ର ୬ଷ୍ଠ ବାର୍ଷିକ ଉତ୍ସବରେ ମୁଖ୍ୟଅତିଥି ଭାବେ ଯୋଗଦେଇ କେନ୍ଦ୍ରମନ୍ତ୍ରୀ ଶ୍ରୀପ୍ରଧାନ କହିଥିଲେ, ୮୦ ଦଶକରେ ବିଶ୍ୱରେ କମ୍ପ୍ୟୁଟରର ଆଗମନ ଏକାଧିକ ଧାରା ଉପରେ ପ୍ରଭାବ ପକାଇଥିଲା । ବିଶ୍ୱ, ଭାରତ, ଓଡ଼ିଶାକୁ ମଧ୍ୟ ଏହା କରିଥିବା ପ୍ରଭାବିତ । ସେହି କମ୍ପ୍ୟୁଟର ଆଗମନ ପରର ପ୍ରଭାବରେ ଓଡ଼ିଶାରେ ଯେଉଁ ନୂଆ ସାମ୍ବାଦିକତା ଧାରାର ଆରମ୍ଭ ହୋଇଥିଲା ସେଥିରେ ବାହାରିଛନ୍ତି ବହୁ ରଚନାତ୍ମକ ମଣିଷ । ଯେଉଁମାନେ କଲେଜରୁ ବାହାରି ସାମ୍ବାଦିକତାର ନୂଆ ଧାରାରେ ନିଜକୁ ସାମିଲ କରିଥିଲେ । ସେହିପରି ପ୍ରଜାତନ୍ତ୍ରରେ ନିର୍ଭିକ ରହିବା,ନିର୍ଭୟ ରହିବାଠାରୁ ବଡ଼ ଅବଦାନ ସୁସ୍ଥ ସମାଜ ପାଇଁ ଆଉ କିଛି ହୋଇନଥାଏ । ମାନବଜାତିର ଇତିହାସରେ ସବୁ ବଡ଼ ପରିବର୍ତନ ଛୋଟିଆ ବୀଜରୁ ହୋଇଆସିଛି । ଲକ୍ଷାଧିକ ଲୋକଙ୍କ ଜନସଭାରୁ କେବେ କୌଣସି ପରିବର୍ତନ ହୋଇନାହିଁ । ପରିବର୍ତନର ବୀଜ ରୂପ ପାଇଥାଏ ସେଇଛୋଟିଆ ଧାରା ଭିତରେ । ନିର୍ଭୟ ଭଳି ଓଡ଼ିଶାର କିଛି ସମ୍ବାଦପତ୍ର ହିଁ ପରିବର୍ତନର ବୀଜହୋଇପାରିବେ ବୋଲି ସେ କହିଥିଲେ । ଏହି ଉତ୍ସବରେ ଅନ୍ୟତମ ସମ୍ମାନିତ ଅତିଥି ଭାବରେ ଯୋଗଦେଇ ନିଜ ଭାଷଣରେ ଢେଙ୍କାନାଳ ଭାରତୀୟ ଜନସଂଚାର ସଂସ୍ଥାନର ନିର୍ଦ୍ଦେଶକ ମୃଣାଳ ଚାଟାର୍ଜୀ କହିଥିଲେ ଯେ ନିର୍ଭୟ ତା’ ନାଁକୁ ସାର୍ଥକ କରିଛି । ଯେତେବେଳେ ଉଭୟ ବାମ ଓ ଡାହାଣ ପକ୍ଷର ଲୋକେ ଗୋଟିଏ ଖବରକାଗଜକୁ ତୁମେ ଆମ ବିରୋଧରେ ଲେଖୁଛ ବୋଲି କହିବେ ସେତେବେଳେ ଜାଣିବ ସେ ସମ୍ବାଦପତ୍ର ଠିକ ଲେଖୁଛି ବୋଲି । ନିର୍ଭୟ ସେହି କାମଟି କରିପାରିଛି । ଆର୍ଥିକ ଅବସ୍ଥାରୁ ଊଦ୍ଧ୍ୱର୍କୁ ଯାଇ ସାଧାରଣ ଲୋକଙ୍କ କଥା, ଠିକ କଥା ଯେତେବେଳେ ଗୋଟିଏ କାଗଜ ଲେଖୁଛି ତାହା ଏକ ବଡ଼ କଥା । ଠିକ ଜାଗାରେ ଠିକ ଭାବରେ ଠିକ କଥା କହିବା ପାଇଁ ବହୁତ ସାହସ ଦରକାର । ଖୁବ କମ କାଗଜର ସେ ସାହସ ଅଛି । ନିର୍ଭୟ ତାହା କରିପାରିଥିବାରୁ ଏକ ସମର୍ପିତ ପାଠକ ଗୋଷ୍ଠୀ ତିଆରି କରିପାରିଛି । ଓଡ଼ିଶା ଓ ଦେଶ ପାଇଁ ଗୋଟିଏ କାଗଜର ଯାହା ଦାୟିତ୍ୱ ହେବା କଥା ତାହା କରିବାକୁ ସକ୍ଷମ ହୋଇଛି ନିର୍ଭୟ । ସୋସିଆଲ ମିଡିଆ ଏବେ ଯେଉଁ ଆବର୍ଜନା ଭର୍ତି ହୋଇଯାଉଛି ତାହାକୁ ନିର୍ଭୟ ସୋସିଆଲ ମିଡିଆର ବ୍ୟାପ୍ତ ଉପସ୍ଥିତି ଦ୍ୱାରା ଦୂର କରିପାରିବ ବୋଲି ପ୍ରଫେସର ଚାଟାର୍ଜୀ ଆଶାବ୍ୟକ୍ତ କରିଥିଲେ । ଏଥିସହ ଢେଙ୍କାନାଳ ଆଇଆଇଏମସିର ବିଦ୍ୟାର୍ଥୀମାନଙ୍କ ସହଭାଗିତା ନିର୍ଭୟ ସହ କରିବାର ଏକ ବିଶେଷ ପ୍ରସ୍ତାବ ସେ ରଖିଥିଲେ ।
ଏହି ଉତ୍ସବରେ ଅନ୍ୟତମ ସମ୍ମାନିତ ଅତିଥି ଭାବେ କିଟ ବିଶ୍ୱବିଦ୍ୟାଳୟର କୂଳପତି ତଥା ବିଶିଷ୍ଟ ଶିକ୍ଷାବିତ ହୃଷିକେଶ ମହାନ୍ତି ତାଙ୍କ ଭାଷଣରେ କିପରି କୌଣସି ବଡ଼ କାଗଜ ନୁହଁନ୍ତି ତାଙ୍କୁ ଜଣେ ସ୍ତମ୍ଭକାର ଭାବେ ପରିଚିତ କରାଇବାରେ ନିର୍ଭୟ ସକ୍ଷମ ହୋଇଛି ତାହା ବତାଇଥିଲେ । ମତେ ଏବେ ଅନେକ ଲୋକ ନିର୍ଭୟ ସାପ୍ତାହିକ ସ୍ତମ୍ଭ ନାମରେ ଜାଣୁଛନ୍ତି । ମୋ’ କଥା ପ୍ରଫେସର ବୋଲି ଅନେକେ ସମ୍ବୋଧନ କରୁଥିବା ବିଷୟ କହିଥିଲେ ପ୍ରଫେସର ମହାନ୍ତି । ନିର୍ଭୟର ସହଯୋଗୀ ସମ୍ପାଦକ ସଂବିତ ମହାପାତ୍ରଙ୍କ ସଂଯୋଜନାରେ ଅନୁଷ୍ଠିତ ଏହି ବାର୍ଷିକ ଉତ୍ସବର ପ୍ରଥମ ଅଧିବେଶନରେ ବାର୍ଷିକ ପୁରସ୍କାର ପ୍ରଦାନ କରାଯାଇଥିଲା । ବିଶିଷ୍ଟ ସାହିତ୍ୟିକ, ଗବେଷକ ଓ ସାମ୍ବାଦିକ ଅସିତ ମହାନ୍ତିଙ୍କୁ ନିର୍ଭୟ ପ୍ରଜ୍ଞା ପୁରସ୍କାର, ନିଆରା ଶିକ୍ଷା ଆନ୍ଦୋଳନ ରାଜ୍ୟରେ ଚଳାଇଥିବା ଶୋଭନୀୟ ଶିକ୍ଷାଶ୍ରମକୁ ନିର୍ଭୟ ଆଦର୍ଶ ପୁରସ୍କାର ଏବଂ ବିଜ୍ଞାନ ମନସ୍କ ମଣିଷ ମିହିର କୁମାର ପଣ୍ଡାଙ୍କୁ ନିର୍ଭୟ ଗୌରବ ପୁରସ୍କାର ପ୍ରଦାନ କରାଯାଇଥିଲା । ନିର୍ଭୟର ରାୟଗଡ଼ା ପ୍ରତିନିଧି ସନ୍ତୋଷ କୁମାର ପାତ୍ର, ଉଦଳା ପ୍ରତିନିଧି ଅମୀୟ କୁମାର ବଳ ଏବଂ ନୟାହାଟ ପ୍ରତିନିଧି ରଶ୍ମିରଂଜନ ସାହୁଙ୍କ ସହ ନିର୍ଭୟ ପରିବାରର ସଦସ୍ୟ ସଂଜୟ କୁମାର ଜେନା ଏବଂ ତୃପ୍ତିଶ୍ରୀ ମହାନ୍ତିଙ୍କୁ ବିଶେଷ ଭାବେ ସମ୍ମାନିତ କରାଯାଇଥିଲା । ଦ୍ୱିତୀୟ ଅଧିବେଶନରେ ନିଆରା ପଥିକମାନଙ୍କ ଉପରେ ଏକ ବିଶେଷ ଆଲୋଚନା ଅନୁଷ୍ଠିତ ହୋଇଥିଲା । ଯେଉଁଥିରେ ବିଶିଷ୍ଟ ନାଟ୍ୟକାର ସୁବୋଧ ପଟ୍ଟନାୟକ, ବୈଜ୍ଞାନିକ ମିହିର କୁମାର ପଣ୍ଡା, କଂକ୍ରିଟ ଜଙ୍ଗଲରେ ପରିବାର ଉତ୍ପାଦନ ପାଇଁ ଲାଗିଥିବା ମହେଶ୍ୱର ଖିଲାର ଏବଂ ଭାରତୀୟ ମହିଳା ରଗବି ଦଳର ବରିଷ୍ଠ ସଦସ୍ୟା ଶୁଭଲକ୍ଷ୍ମୀ ବାରିକ ଯୋଗଦେଇ ନିଜ ଅମଡ଼ାବାଟର କଥା ଭାବପୂର୍ଣ୍ଣ ଢଙ୍ଗରେ କହିଥିଲେ

Leave A Reply

Your email address will not be published.